Málþing um Spánverjavígin 1615

Helgina 24.-25. júní 2006 var haldið málþing í Dalbæ á Snæfjallaströnd á vegum Snjáfjallaseturs og verkefnisins Vestfirðir á miðöldum í samstarfi við Sögufélag Ísfirðinga, Strandagaldur og Náttúrustofu Vestfjarða um Spánverjavígin sem áttu sér stað árið 1615. Á málþinginu var samskiptum Íslendinga og Baska á 17. öld gerð skil; fornleifarannsóknum sem tengjast samskiptum þjóðanna, sögulegum forsendum Spánverjavíganna, eftirmálum þeirra og samhengi við aðra atburði þessa tíma, hvalveiðum Baska og viðskiptatungumálinu lingua franca, útbreiðslu þess og þýðingu fyrir samfélag þess tíma. Á Jónsmessukvöldvöku á laugardagskvöldinu flutti Steindór Andersen valdar rímur úr Víkingarímum sem fjalla um Spánverjavígin og Elfar Logi Hannesson flutti frumsaminn leikþátt, Áfram Spánn, sem byggir á upplifun Jóns lærða á Spánverjavígunum. Á sunnudeginum var vettvangsskoðun með leiðsögn í Æðey og Ögur. Málþingið tókst vel í alla staði og var rætt um áframhaldandi samstarf um að kanna betur samskipti Íslendinga og Baska í byjun 17. aldar.

Á myndinni eru frá vinstri: Ólafur J. Engilbertsson, framkvæmdastjóri Snjáfjallaseturs, Jón Þ. Þór, fundarstjóri, Magnús Rafnsson, sem fjallaði um Jón lærða og fornleifafund í Steingrímsfirði, Jónas Kristjánsson, sem fjallaði um útgáfu ritsins um Spánverjavígin, Torfi Tulinius, sem fjallaði um það hvort Spánverjavígin hafi verið fjöldamorð, Már Jónsson, sem fjallaði um Spánverjavígsdóma Ara í Ögri, Selma Huxley sem fjallaði um sögu Martins de Villafranca, Michael Barkham, sem fjallaði um hvalveiðar Baska við Nýfundnaland, Trausti Einarsson, sem fjallaði um hvalveiðar Baska við Ísland og spænsk-enska ritið Itsasoa, Sigurður Sigursveinsson, sem fjallaði um Spánverjavígin eins og þau birtust í “Sannri frásögu” Jóns lærða og Henrike Knörr, sem fjallaði um viðskiptatungumál sem þróaðist í samskiptum þjóðanna.

Erindi flutt á málþinginu

Sýning um Spánverjavígin