Ferðaþjónustan Dalbæ:

Ferðaþjónustan Dalbæ er opin til 22. ágúst sumarið 2010.

Áslaug Jóhannsdóttir og Sigurður Sigurðsson sjá um ferðaþjónustuna í Dalbæ

Gsm 8989 300

thruman@simnet.is

Drangajökull – sýning í Dalbæ

Laugardaginn 10. júlí var dagskrá um Drangajökul á vegum Snjáfjallaseturs í Dalbæ á Snæfjallaströnd. Þar var opnuð sýning þar sem gerð verður grein fyrir sérstöðu Drangajökuls og breytingum á honum í gegnum tíðina, leiðum yfir jökulinn, aðdráttum yfir hann fyrr á tímum og lífríki og jarðfræði svæðisins. Helgi Björnsson jöklafræðingur á raunvísindastofnun Háskóla Íslands og Haukur Jóhannesson jarðfræðingur hjá Íslenskum orkurannsóknum voru með erindi. Oddur Sigurðsson jöklafræðingur á Veðurstofu Íslands og Eyþór Einarsson, grasafræðingur hjá Náttúrufræðistofnun Íslands, leggja auk þeirra til texta í skrá ásamt fleirum.

Ferðaþjónustan Svaðilfari í Skjaldfannardal kynnti hestaferðir sínar í kringum Drangajökul og sýnt var úr kvikmynd Páls Steingrímssonar Ísaldarhesturinn sem er að hluta tekin í slíkri ferð. Drangajökull er fimmti stærsti jökull landsins en hefur þó lítt verið kannaður. Hann er að ýmsu leyti frábrugðinn öðrum jöklum. Saga hans er þó allvel þekkt þar sem hann olli nokkrum búsifjum á harðindatímabilinu sem kennt er við litlu ísöld, en hann virðist ekki fara jafn halloka fyrir heimshlýnun undanfarinna ára eins og aðrir jöklar landsins. Þjóðhátíðarsjóður og Menningarráð Vestfjarða styrktu sýninguna.

Útgáfur Snjáfjallaseturs

Útgáfur Snjáfjallaseturs eru til sölu í Dalbæ, en fást einnig sendar gegn póstkröfu. Félagsmenn njóta 20% afsláttar frá útsöluverði sem er sem hér segir: Undir Snjáfjöllum eftir Engilbert Ingvarsson, kr. 3.900; Híbýli og húsbændur á Snæfjallaströnd 1930-1940 eftir sama höfund, kr. 2.000; Krafturinn í ánni – Snæfjallaveita og rafvæðing Inndjúps eftir Helga M. Sigurðsson, kr. 1.500; Heyrði ég í hamrinum – kveðandi og þjóðlegur fróðleikur kvenna úr Snæfjalla- og Grunnavíkurhreppum hinum fornu, kr. 2000. Kver um skólahald kostar kr. 500 og kver sem fylgir sýningunni Horfin býli og huldar vættir er til bæði á íslensku og ensku og kostar kr. 700. Auk þessa er nú komin út skrá um Drangajökul sem kostar kr. 1000 og þar með kr. 800 fyrir félagsmenn.