Framhaldsaðalfundur

Boðað er til framhaldsaðalfundar Snjáfjallaseturs miðvikudaginn 16. nóvember 2011, kl 20 að Hringbraut 121, Reykjavík

Dagskrá:

1. Skýrsla stjórnar Snjáfjallaseturs og skýrsla frá Félagi um Dalbæ
2. Ársreikningar 2010
3. Verkefni framundan

Stjórnin

Ferðaþjónustan í Dalbæ

Ferðaþjónustan í Dalbæ á Snæfjallaströnd verður rekin frá 10. júní - 21. ágúst sumarið 2011 og þar verða sögusýningar og viðburðir á vegum Snjáfjalla­seturs.

Spænsk dagskrá 3. júlí 2011

Sunnudaginn 3. júlí kl 15 verður spænsk dagskrá í Dalbæ. Kristinn H. Árnason gítarleikari verður með tónleika, reiddir verða fram spænskir réttir og sagt frá Spánverjavígunum 1615. Ef nægar pantanir berast verður boðið upp á bátsferð á slóðir Spánverjavíganna. Jafnframt verður opnuð sýning um gróðurfar á Snæfjallaströnd, byggð á rannsóknum Harðar Kristinssonar.

Drangajökull – náttúra og mannlíf

Snjáfjallasetur hefur gefið út ritið Drangajökull – náttúra og mannlíf. Þar er gerð grein fyrir sérstöðu Drangajökuls og breytingum á honum í gegnum tíðina, leiðum yfir jökulinn, aðdráttum yfir hann fyrr á tímum og lífríki og jarðfræði svæðisins. Helgi Björnsson jöklafræðingur á raunvísindastofnun Háskóla Íslands og Haukur Jóhannesson jarðfræðingur hjá Íslenskum orkurannsóknum eiga greinar í ritinu. Einnig Oddur Sigurðsson jöklafræðingur á Veðurstofu Íslands og Eyþór Einarsson, grasafræðingur hjá Náttúrufræðistofnun Íslands, sem fjallar um plöntur á jökulskerjunum og sérstæða flóru Snæfjallastrandar, en Eyþór hefur hvergi birt þessar rannsóknir sínar áður. Ritið um Drangajökul fæst í nokkrum helstu bókaverslunum, hjá Ferðafélagi Íslands og hjá útgefanda.

Útgáfur Snjáfjallaseturs

Útgáfur Snjáfjallaseturs eru til sölu í Dalbæ, en fást einnig sendar gegn póstkröfu. Félagsmenn njóta 20% afsláttar frá útsöluverði sem er sem hér segir: Undir Snjáfjöllum eftir Engilbert Ingvarsson, kr. 3.900; Híbýli og húsbændur á Snæfjallaströnd 1930-1940 eftir sama höfund, kr. 2.000; Krafturinn í ánni – Snæfjallaveita og rafvæðing Inndjúps eftir Helga M. Sigurðsson, kr. 1.500; Heyrði ég í hamrinum – kveðandi og þjóðlegur fróðleikur kvenna úr Snæfjalla- og Grunnavíkurhreppum hinum fornu, kr. 2000. Kver um skólahald kostar kr. 500 og kver sem fylgir sýningunni Horfin býli og huldar vættir er til bæði á íslensku og ensku og kostar kr. 700.